डोटी,माघ १८।डोटीको पिपल्ला बजारमा मोटरसाइकल दुर्घटना हुँदा ३ जना घाइते भएका छन्। बिहिवार साँझ ७:१० बजे डोटीको दिपायल सिलगढी नगरपालिका–४ पिपल्ला बजारमा से ६ प ७२५७ नम्बरको मोटरसाइकल दुर्घटना हुँदा तीन जना घाइते भएको प्रहरीले जनाएको छ।
दुर्घटनामा परि घाईते हुनेमा मोटरसाइकल चालक २६ वर्षको पवन खड्का, पछाडि सवार दिपायल सिलगढी ३ का २० वर्षीय विकास भण्डारी र दिपायल सिलगढी नगरपालिका–५ का २० वर्षीय दीपेश भण्डारी छन्।
जिल्ला प्रहरी कार्यालय डोटीका अनुसार एयरपोर्टबाट पिपल्ला बजार तर्फ आइरहेको मोटरसाइकल तीव्र गतिका कारण अनियन्त्रित भई दुर्घटनामा परेको हो। घाइते तिनै जनालाई शैलेश्वरी अस्पताल दिपायलमा उपचार भैरहेको छ। उनीहरूको अवस्था सामान्य रहेको प्रहरीले जनाएको छ।
