पुस २०, डोटी । डोटीमा एक महिलाको शङ्कास्पद मृत्यु भएको छ । जिल्लाको सायल गाउँपालिका वडा नम्बर ६ दल्लेख बस्ने अन्दाजी २३ वर्षिया शान्ति नेपालीको आज (शनिवार) शङ्कास्पद मृत्यु भएको प्रहरीले जानकारी दिएको छ ।
जिल्ला प्रहरी कार्यालय डोटीका प्रहरी नायव उपरीक्षक (डिएसपी) भिमलाल भट्टराईले दिएको जानकारी अनुसार शान्तिको मृत्यु शङ्कास्पद देखिएपछि मृतकका श्रीमान् भिम नेपालीलाई नियन्त्रणमा लिइएको छ । डिएसपी भट्टराईका अनुसार मृतकका श्रीमानले बिहान करिब ४ बजे शान्तिको मृत्यु भएको शङ्कास्पद खबर माइती पक्षलाई दिएको बुझिएको छ । शान्तिको मृत्युको कारण नखुलाई सतगतको तयारी गरिएपछि माइती पक्षले घटना बारे प्रहरीलाई जानकारी गराएका थिए ।
मृतकका काका नाता पर्ने के.आई.सिंह गाउँपालिका वडा नम्बर ४ बस्ने लाले नेपालीले प्रहरी चौकी वायलमा मौफिक जानकारी गराएपछि मृतकका श्रीमानलाई नियन्त्रणमा लिएको प्रहरीले बताएको छ । शवलाई पोस्टमार्टमको लागि जिल्ला अस्पतालमा पठाइएको र घटनाको अनुसन्धान भइरहेको डिएसपी भट्टराई बताए ।
