डोटी , नेपाल प्रेस युनियनको ३४ औं स्थापना दिवसको अवसरमा प्रेस युनियन डोटी शाखाले मंगलबार सुजङ अस्पताल र सेती माहाकाली अस्पतालमा रहेका बिरामीलाई फलफूल वितरण तथा पत्रकारहरुको स्वास्थ्य परिक्षण गर्दै साताव्यापी कार्यक्रमको शुभारम्भ गरेको छ। कार्यक्रम अन्तर्गत ३० जना बिरामीहरूलाई फलफूल वितरण गरिएको र जिल्ला आयुर्वेद स्वास्थ्य केन्द्र डोटीमा पत्रकारहरुको निशुल्क स्वास्थ परिक्षण गरेको छ।
‘भौतिक र पेशागत सुरक्षा सहित पत्रकारको सम्मानजनक पहिचान’ भन्ने नारासहित सुरु गरिएको अभियानमा नेपाली कांग्रेसका जिल्ला सभापति नरेन्द्र बहादुर सिंह ,प्रेस युनियनका पदाधिकारी तथा स्वास्थ्यकर्मीहरूको उपस्थिति थियो।
प्रेस युनियन डोटी शाखा अध्यक्ष चक्र कुँवरले स्थापना दिवसको अवसरमा आज साँझ नेपाल प्रेस युनियनको भवन परिसरमा दिप प्रज्वलन, कार्यक्रम रहेको बताउनुभएको छ। यस्तै डोटी शाखाले १५ गते लोकतन्त्रमा प्रेसको भुमिका विषयक विचार गोष्ठी लगायतका कार्यक्रम समावेश गरी स्थापना दिवस बनाउन लागेको अध्यक्ष कुँवरले जानकारी दिनुभएको छ।
स्थापना दिवसको अवसरमा देशभर प्रेस युनियनले सामाजिक उत्तरदायित्व वहन गर्ने उद्देश्यले विभिन्न जनकल्याणकारी गतिविधि सञ्चालन गरिरहेको छ।
