प्रतीक्षा धामी ,
बडिकेदार,डोटी २९ जेठ । डोटीको बडिकेदार गाउपालिकलाई पूर्ण खोप सुनिश्चितता तथा दिगोपना पालिका घोषणा गरिएको छ । ‘पूर्ण खोप, सुनिश्चित भविष्य’ भन्ने नाराका साथ खोप समन्वय समितिले घोषणा गरेको हो ।
बडिकेदार गाउँपालिकाका अध्यक्ष भैरब साउदको सभा अध्यक्षतामा प्रमुख अतिथि जिल्ला समन्वय समितिका प्रमुख लक्ष्मण सिंह , बिशिस्ट अतिथी गाउपालिका उपाध्यक्ष डम्मरी बिष्ट कलेल रहनु भएको थियो ।
जिल्ला समन्वय समिति डोटीका प्रमुख तथा खोप समन्वय समितिका संयोजक लक्ष्मण बहादुर सिंहले पूर्ण खोप सुनिश्चितता पालिका घोषणा गरेका हुन । पालिकालाई पूर्ण खोप सुनिश्चितता प्रमाणपत्र समन्वय प्रमुख सिंहले गाउपालिकाका अध्यक्ष भैरब साउदलाइ हस्तान्तरण गरेका थिए ।
स्थानीय तहका स्वाथ्य कर्मचारीहरुले जनताको जीवन रक्षाका लागि अहम भूमिका निर्वाह गर्दै आइरहेको बताउँदै सिंहले स्वाथ्यकर्मीहरुलाई धन्यवाद ज्ञापन गरे । उनले नेपाल सरकारले तोकेका सम्पूर्ण सूचकहरु पूरा गर्दै कुनै पनि बालबालिका नछुटाएर खोप अभियान सञ्चालन गरी पूर्ण खोप सुनिश्चितता पालिका घोषणा गरिएकोमा बधाई ज्ञापन गरेका छन ।
साना बालबालिका एउटा काचो माटो जस्तै भएकाले उनिहरुको स्वस्थ भबिस्य कस्तो बनाउने भन्ने स्वास्थ्यकर्मी र स्वयंसेविकाको हातमा हुने भएकाले उनिहरुको भबिस्य सङ्ग खेलवाड नगर्न समेत आग्रह गरेका छन।
पालिका अध्यक्ष साउदले खोप सुनिश्चितता घोषण गर्न सहयोग गर्ने कर्मचारीलाई धन्यवाद दिँदै पालिकाले स्वाथ्य क्षेत्रमा गर्न सक्ने सहयोग गर्न तत्पर रहेको बताए ।
१६ देखि ५९ महिना सम्मका सबै बालबालिकाहरुलाई १५ महिनाको उमेर भित्र पाउनु पर्ने सम्पूर्ण खोप दिलाई पूर्ण खोप पाएको सुनिश्चित गरेपछि पालिकालाई पूर्ण खोप सुनिश्चितता तथा दिगोपना पालिका घोषणा गरिएको पालिका अध्यक्ष भैरब साउदले बताए ।
खोपले बालबालिकामा विभिन्न रोगबाट बच्ने प्रतिरोधात्मक क्षमता बढ्ने भएकाले खोपबाट बालबालिकालाई वञ्चित गराउन नहुने गाउपालिका उपाध्यक्ष डम्मरी बिष्ट कलेलले बताएकि छन ।
प्रमुख प्रशासकीय अधिकृत शेर बहादुर बुढाले जनतालाई सहज, र छिटो छरितो सेवा डेलिभरी गर्नु कर्मचारीको दायित्व भएको बताउँदै विकट र दुर्गममा सेवा दिने स्वाथ्यकर्मीको साहस प्रती उच्च सम्मान व्यक्त गरे ।
राज्यको खोज र खोप नीति अनुरुप विभिन्न तथ्याङ्क र सूचकहरु पूरा गरेर पालिकालाई पूर्ण खोप सुनिश्चितता तथा दिगोपना घोषणा गरिएको हो ।
पालिकाका ५ वटै वडाहरुलाई पूर्ण खोप सुनिश्चितता घोषणा गरिएको र हाल सोही तथ्याङ्क र सूचकका आधारमा पूर्ण खोप सुनिश्चितता तथा दिगोपना पालिका घोषणा गरिएको खड्यौली स्वास्थ्य शाखा प्रमुख योगेन्द्र शाहिले बताए । राष्ट्रिय खोप तालिका अनुसार पालिकाका ५ वटै वडाका खोप लगाउने उमेर समूहका बालबालिकाले खोप लगाएको सुनिश्चित गरिएपछि पूर्ण खोपयुक्त सुनिश्चित पालिका घोषणा गरिएको हो ।
गाउँपालिकाले दिगोपना र पूर्ण खोप सुनिश्चितताका लागि हरेक वर्ष नियमित खोपको घरभेट सर्वेक्षण गर्ने उमेर अनुसार खोप पाएनपाएको यकिन गर्ने, खोप लगाउन छुटेको पाइएमा खोप दिने व्यवस्था गरेको छ । प्रत्येक वडामा वडास्तरीय खोप समन्वय समितिले पालिकालाई बालबालिकाले खोप लगाएको सुनिश्चित गरेपछि पालिकालाई पूर्ण खोपयुक्त पालिका सुनिश्चितता घोषणा गरिएको घोषणा कार्यक्रममा जानकारी दिइएको थियो ।
खोप लगाउने उमेर समूहका सबै बालबालिकाले खोप लगाएको सुनिश्चित भएपछि पालिकालाई पूर्ण खोपयुक्त पालिका सुनिश्चितता तथा दिगोपना घोषणा गरिएको हो ।
कार्यक्रममा खोप अभियान सञ्चालन गर्न खटिएका स्वास्थ्यकर्मीहरुलाई दोसल्ला र प्रमाणपत्र सहित सम्मान गरिएको थियो । साथै स्वास्थ्यको क्षेत्रमा रहेर सूचना प्रसारण गरि अहम भुमिका खेलेको भन्दै सामुदायिक रेडियो बडिकेदार लाई प्रमाणपत्र सहित सम्मान गरिएको छ ।
