गणेश मौनी
असार १० डोटी
डोटीको बडीकेदार गाउँपालिकाले आगामी आर्थिक वर्ष २०८२÷८३ का लागि ४४ करोड २१ लाख ५० हजार रुपैयाँको बजेट सार्वजनिक गरेको छ ।
गाउँपालिकाको १७ औँ गाउँ सभामा गाउँपालिकाकी उपाध्यक्ष डम्मरी विष्ट कलेलले अनुमानित कुल आय ४४ करोड २१ लाख ५० हजार हुने उल्लेख गरेकी छन् ।
बजेटमा कृर्षि, पर्यटन, शिक्षा, पूर्वाधार, स्वास्थ्य, वातावरण संरक्षण र सुशासनमा विशेष जोड दिइएको उल्लेख छ ।
बजेट वक्तव्यमा गुणस्तरीय शिक्षा र स्वास्थ्य सेवा, गुणस्तरीय पूर्वाधार निर्माण, व्यावसायिक कृषि तथा पशुपालन, रोजगारी सिर्जना तथा पर्यटन प्रवर्द्धन, लक्षित वर्गको सशक्तीकरण, वातावरण संरक्षण र विपद् व्यवस्थापन, संस्थागत सशक्तीकरण र उत्तरदायित्वयुक्त सेवा प्रवाहलाई प्राथमिकता दिइएको छ ।
आगामी वर्षका लागी सङ्घीय सरकार समानिकरण अनुदान ९ करोड १६ लाख, सङ्घीय राजश्व वाँड फाड १० करोड ४३ लाख , सङ्घीय सरकार शर्शत अनुदान १८ करोड २९ लाख, सङ्घीय सरकार समपूरक अनुदान ८५ लाख, प्रदेश सरकार समानिकरण अनुदान ७५ लाख २६ हजार, आन्तरिक आय र अल्या २ करोड १४ लाख ६४ हजार अनुमान गरिएको बजेट उपाध्यक्ष डम्मरी विष्ट कलेलले प्रस्तुत गर्नु भएको छ ।
प्रस्तुत बजेट तथा योजना माथि अर्को गाउँभाको बैठकमा छलफल गर्ने गरी बैठक समापन गरिएको छ । अर्को गाउँ सभा बैठक यही असार २० गतेका लागी गाउँ सभाका अध्यक्ष भैरव बहादुर साउँदले आव्हान गरेका छन् ।
