अछाम– अछाममा दुई किशोरी मृत अवस्थामा फेला परेका छन्।
बाख्रा चराउन गएका ढकारी गाउँपालिका–८ पल्साता बस्ने १३ र १५ वर्षीया दुई किशोरी सरस्वती खड्का र ईश्वरी खड्काको शव फेला परेको अछामका प्रहरी प्रमुख डीएसपी ईश्वरीप्रसाद भण्डारीले बताए।
मृतक किशोरी एकै घरका फुपू, भदै नाता पर्ने उनले बताए। प्रहरी प्रमुख भण्डारीका अनुसार सरस्वती र ईश्वरी शुक्रवार गाईवस्तु चराउन सँगै जंगल गएका थिए।
साँझसम्म पनि उनीहरु घरमा नआएपछि परिवारले खोजी गरिरहेको थियो। प्रहरीमा भने खबर भएको थिएन।
किशोरीका परिवारले खोजी गर्ने क्रममा स्थानीय षोडशा सामुदायिक वनमा शनिवार साँझ ६ बजेपछि उनीहरु जंगलमा मृत अवस्थामा भेटिएको भण्डारीले जानकारी दिए।
घटनास्थलमा प्रहरी पुगिसकेको भए पनि राति अनुसन्धान हुन सकेन। आइतवार बिहानै घटनास्थलमा खटिएर अनुसन्धान गर्ने प्रहरीले जनाएको छ।
